MESSAGE FROM THE PRESIDENT: 40th Sacerdotal Anniversary of Rev. Fr. Anacleto Clemente Ignacio and Rev. Msgr. Enrico Saguinsin Santos, H.P.

KAKATHA NEWS EVENTS 2013


Dated: December 11, 2013

STA. MARIA, BULACAN - The President of the Kapatiran ng Kapariang Taga-Hagonoy, Inc. gave the following message for the 40th Sacerdotal Anniversary of Rev. Fr. Anacleto Clemente Ignacio (Sta. Monica) and Rev. Msgr. Enrico Saguinsin Santos, H.P. (San Sebastian):

Office of the President

Para kina: 

Rdo. Msgr. Enrico Saguinsin Santos, H.P. at Rdo. P. Anacleto Clemente Ignacio

Kapayapaan kay Kristo!

     Isang taos-pusong pagbati ang aking hatid sa pagdiriwang ninyo ng ika-40 anibersaryo ng pagkapari noong ika-1 ng Disyembre, 2013. Mahalaga ang bilang na 40. Sinasabi sa Banal na Kasulatan na sa loob ng 40 araw at gabi nang umulan at bumaha noong panahon ni Noe at ito ang nagbigay daan sa panimula ng bagong sangkatauhan. Gayun din, ang Panginoong Hesus ay gumugol ng 40 araw at gabi na nanalangin at nag-ayuno sa ilang at ito ang naging paghahanda para sa pasimula ng kanyang misyon at gampanin bilang Mesiyas. At sa muling pagkabuhay, nanatili ang Panginoon na kasama ang mga alagad sa loob ng 40 araw at saka Siya umakyat sa langit at lumuklok sa kanan ng Ama, at ito ang nagbigay-daan sa pagdating ng Espiritu Santo at pasimula ng Sambayanang Kristiyano.

      Kaya naman, makabuluhan ang inyong pagdiriwang ng ika-40 taon ng pagkapari. Ito ay tanda ng panibagong simula ng masigla, makabuluhan at mabunying paglilingkod para sa Diyos at sa bayan. Pasimula ng panibagong yugto sa paglalakbay na may sigla, galak at marubdob na hangaring lumago at umunlad sa paglilingkod sa Panginoong Hesus, ang tanging huwaran ng mga lingkod ng Diyos.

     Kaya sa inyo, Msgr. Rico at Fr. Ety, ang aking pagbati sa pasimula ng makabuluhan, makatuturan at kapaki-pakinabang na pagiging pari “magpakailanman!”

Ad multos annos!